HK lagði Stjörnuna og komst í undanúrslit

HK gerði sér lítið fyrir og tryggði sér sæti í undanúrslitum Eimskipsbikarkeppni kvenna með sigri á Stjörnunni, 30-29. Fram er einnig komið í undanúrslitin.

Staðan í hálfleik var 17-15, Stjörnunni í vil en HK-stúlkur reyndust sterkari á lokasprettinum og fögnuðu heldur óvæntum sigri.

Elísa Ósk Viðarsdótitr og Brynja Magnúsdóttir fóru á kostum og skoruðu níu mörk hvor í leiknum. Dröfn Haraldsdóttir varði sextán skot í markinu.

Hanna G. Stefánsdóttir skoraði níu mörk fyrir Stjörnuna og Jóna Margrét Ragnarsdóttir sex.

HK er í fimmta sæti N1-deildar kvenna með níu stig en Stjarnan í því þriðja með átján. Flestir reiknuðum með öruggum sigri Stjörnunnar í kvöld en annað kom á daginn.

Fylkir og Valur eru einnig komin áfram í undanúrslit eftir sigur í sínum leikjum í gær. Fylkir vann Fjölni, 41-14, og Valur lagði ÍBV, 35-21.

Í kvöld vann svo Fram stórsigur á Val 2, 46-12, og tryggði sér þar með einnig sæti í undanúrslitunum.

Liðin í undanúrslitum Eimskipsbikarkeppni kvenna:

HK

Valur

Fram

Fylkir