Bandarískur þingmaður skotinn í höfuðið

Gabrielle Giffords þingmaður í Bandaríkjunum var skotinn fyrr í kvöld í bænum Tucson í Arizona. Fjölmiðlar vestra segja að hún hafi látist af sárum sínum á sjúkrahúsi. Talsmaður hennar segir hinsvegar að hún sé ekki látin og sé í aðgerð.

Fjölmiðlar segja að minnsta kosti tólf séu særðir en byssumaðurinn skaut nokkrum skotum.

Vitni segja að byssumaðurinn hafi staðið afar nálægt henni þegar hann skaut hana í höfuðið. Fjöldafundur tileinkaður Giffords var við matvörubúð í bænum þegar árásarmaðurinn hóf skothríðina.

Bandarískir fjölmiðlar greindu frá því stuttu eftir árásina að Giffords hefði látist. Þeir hafa nú dregið þær fréttir til baka eftir að talsmaður hennar tjáði fjölmiðlum að hún væri í aðgerð.

Gabrielle Giffords var demókrati og átti sæti í fulltrúardeild Bandaríkjaþings. Auk þess átti hún sæti í mörgum þingnefndum, meðal annars hermála- og utanríkismálanefnd.