Góð byrjun hjá Tom Tom

Tónlist ****

Andefni

Prince Valium

Góð byrjun hjá TomTom

Prince Valium er listamannsnafn Þorsteins Konráðs Ólafssonar, en hann hefur verið að búa til raftónlist í a.m.k. áratug. Ég man fyrst eftir honum á Stefnumótakvöldum tónlistarblaðsins Undirtóna, en hann átti einmitt sex lög á fyrsta Stefnumótadisknum árið 2001.

Andefni er önnur sólóplata Prince Valium í fullri lengd. Sú fyrri, Andlaus, kom út hjá breska fyrirtækinu Resonant árið 2006 og fékk fínar viðtökur. Eins og nafnið gefur til kynna er tónlist Prince Valium í rólegri kantinum, þó að lögin á nýju plötunni séu reyndar misjafnlega hröð. Maður heyrir að hann er undir áhrifum frá gamalli ambient-tónlist en hann setur fleiri virk efni í blönduna og hefur þróað sitt eigið afbrigði sem hann er að vinna með. Andlaus var svolítið síðrokkskotin, en á Andefni er hljómurinn tærari og tónlistin bjartari og melódískari. Tólf lög eru á Andefni. Þau eru nokkuð fjölbreytt en það er góður heildarsvipur á plötunni sem gerir það að verkum að hún virkar vel spiluð í gegn, frá upphafi til enda.

Andefni er fyrsta útgáfa nýrrar íslenskrar plötuútgáfu, TomTom Records, sem sérhæfir sig í raftónlist. Hún kemur út á stafrænu formi og er fáanleg í gegnum vefsíðu útgáfunnar www.tomtomrecords.com. Það er gleðiefni að ný raftónlistarútgáfa taki nú til starfa og óskandi að hún fái hljómgrunn. Hún byrjar í það minnsta vel, Andefni er flott plata og ágætur vitnisburður um þá fínu hluti sem fyrirfinnast í íslenskri raftónlist.

Trausti Júlíusson

Niðurstaða: Björt og melódísk raftónlistarplata.