Diplómati rappar um ömmu sína og Smáralind

„Þessi diskur hefur blundað í mér í mörg ár,“ segir Jónas Haraldsson, tónlistarmaður, starfsmaður utanríkisráðuneytisins og stundakennari við Háskóla Íslands.

Jónas hefur gefið út sína fyrstu plötu undir listamannsnafninu The Adventures. Plata Jónasar heitir Collected Works Vol. 2 en á henni eru sjö hip-hop og þrjú rapplög. „Ég hef lengi verið að gera tónlist en á síðustu árum hef ég náð að gera lög sem mér finnst í lagi, svo ég ákvað bara að láta á þetta reyna og hafa gaman af,“ segir Jónas. „Platan er í raun safndiskur. Ég hef verið að safna lögum undanfarin ár, en fyrsta lagið á disknum er frá 2004 og það síðasta frá 2011.“

Spurður hvort hann hafi áður gefið út disk sem ber nafnið Collected Works Vol. 1, svarar Jónas því neitandi. „Sá diskur er ekki ennþá kominn út. Ég ákvað að vinda mér bara beint í Vol. 2,“ segir Jónas í léttum dúr. Collected Work Vol. 2 er hins vegar í boði á vef Gogoyoko og þar er bæði hægt að hlusta og kaupa, en sjálfur geisladiskurinn kemur út á næstunni.

Jónas vinnur hjá þróunarsviði Utanríkisráðuneytisins ásamt því að kenna valfag í stjórnmálafræði við Háskóla Íslands. Það er því vert að spyrja Jónas hvernig hann tvinni þessi störf við lagasmíðarnar og rappið. „Þetta tvinnast nú ekkert sérstaklega saman. Tónlistin er eitthvað sem ég geri á kvöldin þegar ég kem heim. Það er oft ekki mikið að gera þegar maður býr einn. Þá er fínt að setjast við tölvuna og gera tónlist,“ segir Jónas.

Textasmíðarnar eru þó ekkert í líkingu við það sem maður heyrir hinn almenna rappara fjalla um. Í laginu „Atvinnukærasti“ rappar Jónas um að honum finnist gaman í Smáralind, hann hringi reglulega í ömmu sína og að hann eigi engar sögur af eiturlyfjum eða bílum.

„Ég hringi í alvöru reglulega í ömmu mína og mér finnst gaman í Smáralind. Ég á heldur ekki bíl,“ segir Jónas, sem segist þó ekki sjálfur vera atvinnukærasti. „Ég er bara venjulegur strákur í venjulegri vinnu. Mér finnst alveg óþarfi að búa til einhverja glansímynd af einhverju sem er ekki, enda getur þetta verið fyndið og skemmtilegt líka.“

kristjana@frettabladid.is