Leikur í nýrri Bille August-mynd

„Hann kom til Svíþjóðar og var að leita að sænskum leikara til að leika Hugo Alfén. Ég fór bara í prufur og endaði svo í myndinni,“ segir hinn rammíslenski Sverrir Guðnason.

Sverrir leikur sænska tónskáldið Alfén í nýjustu kvikmynd danska verðlaunaleikstjórans Bille August, The Passion of Marie. Sverrir hefur búið um árabil í Svíþjóð og gert garðinn frægan, meðal annars sem Pontus í sjónvarpskvikmyndunum um Wallander lögreglumann.

August hefur átt góðu gengi að fagna í Ameríku síðan hann gerði hinar mögnuðu kvikmyndir Palla Sigurvegara árið 1987 og Trú, von og kærleik árið 1984. Meðal kvikmynda á ferilskránni eru Hús andanna, Vesalingarnir og Goodbye Bafana. The Passion of Marie er hins vegar fyrsta danska kvikmyndin hans í aldarfjórðung. Hún er byggð á sannsögulegum atburðum og segir frá listamannshjónunum Marie Krøyer og Peder Severin Krøyer og samskiptum þeirra við sænska tónskáldið Alfén.

Leikarinn kann því vel að vinna undir stjórn August, það sé ekkert stress á tökustaðnum. „Hann er mjög vandvirkur og rólegur og veit alveg hvað hann vill,“ segir Sverrir og viðurkennir um leið að myndin sé stórt tækifæri fyrir sig. Leikarinn heldur góðu sambandi við Ísland, kemur hingað tvisvar á ári, en hann hefur haft í nægu að snúast í vinnunni.

„Ég var aðeins í leikhúsinu, lék aðalhlutverkið í söngleik hjá Borgarleikhúsinu í Stokkhólmi. Og svo eru þrjár kvikmyndir fram undan þannig að þetta hefur gengið mjög vel.“- fgg