Verður aftur kynnir

Ricky Gervais verður að öllum líkindum kynnir á Golden Globe-verðlaunahátíðinni, þriðja árið í röð. Það eru samtök erlendra blaðamanna í Hollywood sem standa að þessum verðlaunum en þar eru bestu kvikmyndirnar og sjónvarpsþættirnir heiðraðir.

Til leikarans sást að snæðingi með yfirmönnum hátíðarinnar á fínum veitingastað í París, nánar tiltekið á Chez Benoit. Og það gaf sögusögnunum byr undir báða vængi. Hins vegar var talið að Gervais gæti varla gengið óhultur um Hollywood eftir frammistöðu sína á síðasta ári en þá gerði hann grín að næstum öllum, en sumir fengu vissulega verri útreið en aðrir eins og Charlie Sheen, Robert Downey og Hugh Hefner.

Ricky upplýsti fyrr á þessu ári að hann hefði fengið tilboð um að vera kynnir á hátíðinni en hann væri ekki viss um að þiggja boðið. „Áhorfið fór upp og þeir vildu fá mig aftur. En ég veit ekki hvað ég gæti gert betur og ég geri yfirleitt bara tvær þáttaraðir.“