Vinskapurinn hófst á Airwaves

Írska söngkonan Sinéad O"Connor syngur eigin útgáfu af lagi Johns Grant á væntanlegri plötu sinni sem kemur út í febrúar á næsta ári. Platan kallast How About I Be Me (And You Be You)? og kemur út 20. febrúar.

Lagið eftir Grant er að finna á fyrstu plötu hans, Queen of Denmark, sem kom út á síðasta ári við góðar undirtektir gagnrýnenda. Bæði Grant og O"Connor komu fram á tónlistarhátíðinni Iceland Airwaves í haust og tókst þá með þeim vinskapur. Til að mynda var Grant á meðal gesta á tónleikum írsku söngkonunnar í Fríkirkjunni.

„Þau hittust mikið. Hann kom á giggið og var í kringum hana og borðaði með henni,“ segir Grímur Atlason, framkvæmdastjóri Airwaves. Aðspurður segist hann ekkert hafa heyrt af einhvers konar samstarfi á milli þeirra. „Ég fór ekkert inn í þeirra samræður en hann var mjög opinn og í góðu stuði og hún líka.“

Á næsta ári verða 25 ár liðin síðan fyrsta plata O"Connor, The Lion and the Cobra, kom út. Söngkonan ætlar að fylgja henni eftir með stórri tónleikaferð og verður tilkynnt um tónleikastaði á næstunni. Stutt er síðan hún giftist í fjórða sinn og fór athöfnin fram í baksæti bleiks Cadillac í Las Vegas á 45 ára afmælisdegi hennar. - fb