Fagnar 30 ára afmæli með plötu

Metallica hefur gefið út EP-plötuna Beyond Magnetic í tilefni þrjátíu ára afmælis hljómsveitarinnar.

Þar eru fjögur áður óútgefin lög sem komust ekki á síðustu hljóðversplötu, Death Magnetic, sem kom út 2008. Þau nefnast Hate Train, Just a Bullet Away, Hell and Back og Rebel of Babylon.

Metallica fagnaði stórafmælinu með fernum tónleikum í heimaborg sinni San Fransisco í síðustu viku og þar spilaði sveitin eitt nýtt lag á hverjum tónleikum. Gamlir meðlimir komu fram sem gestir, eða upphaflegi gítarleikarinn Dave Mustaine sem hefur verið forsprakki Megadeath, og upphaflegi bassaleikarinn Ron McGovney. Var þetta í fyrsta sinn frá árinu 1982 sem þeir spiluðu með Metallica.

Annar fyrrverandi bassaleikari, Jason Newsted, var einnig meðal gesta en hann hætti í hljómsveitinni árið 2001 í nokkru fússi.

Einnig komu fram á tónleikunum Lou Reed og meðlimir Black Sabbath, Lynyrd Skynyrd, Judas Priest, Alice In Chains og Faith No More.

Síðan Metallica var stofnuð árið 1981 hefur hún selt yfir eitt hundrað milljónir platna og verið ein vinsælasta rokksveit heims.