Icelandair Group semur við Skýrr

Icelandair Group hefur samið við Skýrr um innleiðingu á Microsoft-heildarlausn fyrir tölvupóst og hópvinnu, skjöl, gæðamál og samskipti. Icelandair Group er 2.500 manna samstæða níu fyrirtækja í flugi og ferðaþjónustu, sem starfa um allan heim.

Björgólfur Jóhannsson, forstjóri Icelandair Group, segir að það sé mikil breyting með hugbúnaðarhöguninni hjá fyrirtækinu. Hann segir að starfsfólkið hafi hingað til notað Lotus Notes fyrir ofangreind verkefni allt frá árinu 1995. „Nú verða stakkaskipti á vinnuumhverfi starfsfólks á næstu mánuðum þegar að við færum okkur yfir í Microsoft-lausnamengið. Við höfum miklar væntingar til jákvæðra áhrifa þeirrar þróunar," segir Björgólfur í tilkynningu.

Gestur G. Gestsson, forstjóri Skýrr, segir að Icelandair sé kröfuharður viðskiptavinur en það sé tilhlökkunarefni að uppfylla þarfir hans. Microsoft-heildarlausnin sem um ræðir hefur yfirskriftina „All-in" og mér finnst sú yfirskrift ríma vel við þjónustustefnu okkar hjá Skýrr," segir hann.

Þá er einnig haft eftir Halldóri Jörgensyni, framkvæmdastjóra Microsoft á Íslandi, að innleiðingin eigi eftir að verða Icelandair Group til góðs.

Lausnirnar sem verða innleiddar hjá Icelandair Group eru nánar tiltekið Microsoft Office, Outlook, Exchange, SharePoint og Lync. Einnig mun starfsfólki Icelandair Group bjóðast Microsoft Office til heimilisafnota gegn vægu gjaldi.