Djokovic mætir Murray | Undanúrslitin klár

Úrslit dagsins á Opna ástralska meistaramótinu í tennis voru öll eftir bókinni en nú er fjórðungsúrslitum keppninnar lokið.

Í karlaflokki báru þeir Andy Murray og Novak Djokovic báðir sigur úr býtum í sínum viðureignum og mætast þeir í undanúrslitum keppninnar á föstudagsmorgun klukkan 8.30.

Í kvennaflokki komust þær Maria Sharapova og Petra Kvitova einnig áfram eftir nokkuð auðveldan sigur á andstæðingum sínum í 8-manna úrslitum. Þær munu því mætast í undanúrslitum.

Fyrirfram er 32 sterkustu keppendum mótsins raðað inn í mótið samkvæmt styrkleikaröð til að forðast að fjórir bestu mætist ekki innbyrðis fyrr en í fyrsta lagi í undanúrslitum.

Er það nú raunin að fjórir sterkustu karlarnir eru allir komnir áfram í undanúrslitin og þrjár af fjórum sterkustu konunum. Aðeins Kim Clijsters (11. sterkasti keppandi í kvennaflokki) er ekki í þeim hópi en hún sló út Caroline Wozniacki, efstu konu heimslistans, í fjórðungsúrslitunum í gær.

Djokovic og Murray öflugir

Djokovic, besti tenniskappi heimsins í dag, fékk í raun erfiðasta verkefnið af öllum í fjórðungsúrslitunum. Hann þurfti að kljást við David Ferrer frá Spáni sem er í fimmta sæti heimslistans.

Djokovic hafði sigur í þremur settum, 6-4, 7-6 og 6-1 en mátti hafa fyrir honum, sérstaklega þar sem hann meiddist lítillega í öðru setti. Hann vann það í upphækkun, 7-4.

Murray mætti Japananum Kei Nishikori sem varð fyrsti karlinn frá sínu landi til að komast áfram í fjórðungsúrslit á þessu móti í rúm 80 ár. Skotinn sterki vann þó nokkuð þægilegan sigur, 6-3, 6-3 og 6-1. Hefur Murray aldrei sigrað á stórmóti en stefnir nú á að komast í úrslit í á Opna ástralska þriðja árið í röð.

Sharapova stefnir á fjórða titilinn

Maria Sharapova hefur þrátt fyrir ungan aldur átt langan feril í íþróttinni en hún er 24 ára gömul. Hún hefur unnið þrjú stórmót en síðast gerði hún það í Ástralíu fyrir fjórum árum síðan.

Hún þarf nú að keppa við Petru Kivtovu frá Tékklandi í undanúrslitum en þær mættust einmitt í úrslitum á Wimbledon-mótinu í fyrra. Þá hafði Kvitova sigur.

Báðar viðureignirnar í undanúrslitum kvenna fara fram á morgun, sem og viðureign þeirra Roger Federer og Rafael Nadal í undanúrslitum karla.

Undanúrslit karla:

Novak Djokovic, Serbíu (1) - Andy Murray, Bretlandi (4)

Rafael Nadal, Spáni (2) - Roger Federer, Sviss (3)

Undanúrslit kvenna:

Kim Clijsters, Belgíu (11) - Victoria Azarenka, Hvíta-Rússlandi (3)

Petra Kvitova, Tékklandi (2) - Maria Sharapova (4)