Shaq á nærbuxunum í beinni á TNT

Shaquille O'Neal er óhræddur við að gera grín að sér og öðrum og það breytist ekkert þótt að hann sé orðinn heiðvirður sjónvarpsmaður í umfjöllun TNT um NBA-deildina. Það er nefnilega von á öllu þegar Shaq og Charles Barkley eru saman í sjónvarpssal.

Shaquille O'Neal hikaði ekkert við að spranga um á nærbuxunum í beinni á TNT til að standa við sitt eftir eitt af undarlegum veðmálum hans og Barkley. Þeir félagar voru að þræta um það hver væri besti kraftframherjinn í NBA-deildinni þessa stundina í aðdraganda leiks Los Angeles Clippers og Minnesota Timberwolves.

Barkley er hrifnari af Kevin Love hjá Minnesota en Shaq er talsmaður Blake Griffin hjá Clippers. Þeir veðjuðu síðan um það að sá leikmaður sem stæði sig verr í umræddum leik myndi kalla á það að talsmaður hans, Shaq eða Barkley, mætti buxnalaus í sjónvarpssal í næstu útgáfu af "Inside the NBA" á TNT.

Það var ekki mikill munur á tölfræði leikmannanna í umræddum leik. Love var með 17 stig og 14 fráköst en Griffin var með 21 stig, 10 fráköst og 5 tapaða bolta. Love skoraði samt sigurkörfuna í leiknum og hafði því nauman sigur.

Shaq stóð við sitt og hljóp um allt settið á nærbuxunum á milli þess að hann fíflaðist við starfsmenn og aðra í stúdíóinu. Það má sjá myndbrot frá þessu með því að smella hér fyrir ofan.