Notendanöfnum og lykilorðum YouPorn lekið á netið

Tölvuþrjótar brutust inn í netþjóna vefsíðunnar YouPorn og stálu þaðan notendanöfnum og lykilorðum. Gögnin voru síðan birt á internetinu í dag.

Samkvæmt upplýsingum frá YouPorn komust tölvuþrjótarnir að gögnunum í gegnum spjallsíðu vefsíðunnar.

YouPorn er klámsíða þar sem notendur geta birt sín eigin myndbönd. Síðan var hugsuð sem klámfengin útgáfa af vefsíðunni YouTube sem er í eigu Google. YouPorn er ein vinsælasta vefsíða veraldar.

Þúsundum notendanafna og lykilorða var stolið. Það hefur þó reynst erfitt að sanna áreiðanleika þeirra enda eru margir sem gefa upp fölsk netföng við skráningu á síðuna.

Það er fyrirtækið Manwin Holding SARL sem á og rekur YouPorn. Talsmaður Manwin sagði að spjallborðið yrði lokað þangað til að endanlega niðurstaða væri komin í málið.

Manwin Holding SARL rekur nokkrar af vinsælustu klámsíðum á internetinu.