Sara og Þóra í beinni á Eurosport 2

Sara Björk Gunnarsdóttir og Þóra Björg Helgadóttir verða í eldlínunni í dag þegar sænska liðið LdB Malmö heimsækir 1. FFC Frankfurt í seinni leik liðanna í átta liða úrslitum Meistaradeildarinnar.

Íslensku landsliðskonurnar voru í aðalhlutverki í fyrri leiknum þar sem LdB Malmö vann 1-0 sigur á heimavelli en Þóra hélt þá marki sínu hreinu og Sara Björk skoraði sigurmarkið. LdB Malmö nægir því jafntefli til þess að tryggja sér sæti í undanúrslitum keppninnar.

Það er hægt að fylgjast með leiknum í beinni á Fjölvarpinu því Eurosport 2 sýnir leikinn beint. Útsendingin hefst klukkan 13:57 en sjálfur leikurinn á að byrja klukkan tvö.

Sara Björk Gunnarsdóttir hefur þegar skorað 5 mörk í 5 leikjum í Meistaradeildinni á þessu tímabili en hún hefur verið að spila sem framherji að undanförnu. Sara er vön því að spila á miðjunni með íslenska landsliðinu.