Messi skorar innan sem utan vallar

Argentínski snillingurinn Lionel Messi er að verða pabbi í fyrsta sinn ef marka má twitter-færslu hjá argentínska knattspyrnusambandinu. Messi slær hvert metið á fætur öðru og það virðist allt ganga upp hjá kappanum þessa dagana, innan sem utan vallar.

Argentínska knattspyrnusambandið tilkynnti það á twitter-síðu sinni að Antonella Rucozzo, unnusta Lionel Messi, væri ófrísk en hvorugt þeirra hefur þó viljað staðfesta fréttirnar. Rucozzo er æskuvinkona Leo frá Rosario í Argentínu.

Lionel Messi er á lokasprettinum á frábæru tímabili en hann hefur skorað 63 mörk í 52 leikjum í öllum keppnum og er á góðri leið með að bæta markamet Þjóðverjans Gerd Müller sem skoraði 67 mörk fyrir Bayern München tímabilið 1972-1973.

Þetta verður fyrsta barn Messi en hann verður 25 ára gamall í maí. Hver veit nema að annar Messi verði kominn í lið Barcelona árið 2029 eða um það bil en Lionel Messi var 17 ára og 114 daga þegar hann lék sinn fyrsta opinbera leik með aðalliði Barca.