Steinar Óli gaf Giggs og Rooney fimmu

Íslenskum strák eða stelpu á aldrinum 7-9 ára gefst nú tækifæri á að komst í hóp evrópskra barna sem leiða munu leikmenn í úrslitaleik Meistaradeildarinnar í knattspyrnu, UEFA Champions League, inn á leikvanginn í München í Þýskalandi þann 19. maí næstkomandi.

Það var sjö ára gutti úr Varmahlíð í Skagafirði, Steinar Óli Sigfússon, sem datt í lukkupottinn hjá Kreditkorti í fyrra en þá mættust Barcelona og Manchester United á Wembley að viðstöddum 90.000 áhorfendum.

Kreditkort efnir á ný til leiks, þar sem viðskipavinir félagsins með MasterCard geta skráð börn til þátttöku á heimasíðu fyrirtækisins. Heppið barn verður síðan valið úr hópnum til að fara á úrslitaviðureign Meistaradeildarinnar í knattspyrnu ásamt foreldri eða forráðamanni. Spennan fyrir úrslitaleikinn er mikil því líklegt er talið að þar muni mætast spænsku risarnir Barcelona og Real Madrid.

„Það var ótrúleg heppni að vera valinn til að fá að fara út og ferðin var algjört ævintýri. Skemmtilegast var að fá að leiða leikmann út á völlinn og fá að gefa Giggs, Rooney, Valencia og hinum United-leikmönnunum fimmu," segir Steinar Óli og hvetur alla 7-9 ára krakka sem hafa áhuga á fótbolta til þess að láta skrá sig í leikinn.

Börn á aldrinum 7-9 ára eru gjaldgeng í þennan skemmtilega leik og þurfa jafnframt að vera 110-130 cm á hæð. Til mikils er að vinna því allt er innifalið fyrir vinningshafann; flug og gisting, miðar á leikinn fyrir barn og fylgdarmann og dagpeningar.

Þeir sem skrá sig þurfa að nota MasterCard kortið sitt a.m.k. 10 sinnum á gilditíma leiksins, frá 1. apríl til 30. apríl 2012. Vinningshafinn verður dreginn út 1. maí en auk eigin barna er einnig heimilt að skrá til leiks frænda, frænku eða vini að fengnu samþykki forráðamanna.

Þetta er í fjórða sinn sem Kreditkort og MasterCard – sem er einn aðalstyrktaraðila UEFA Champions League – bjóða íslensku barni og forráðamanni leik í deildinni.