UEFA gefur grænt ljós á að John Terry lyfti bikarnum á loft

John Terry fyrirliði enska úrvalsdeildarliðsins Chelsea er enn helsta fréttaefnið á Bretlandseyjum og víðar eftir að hann fékk rauða spjaldið í undanúrslitum Meistaradeildarinnar gegn Barcelona frá Spáni. Chelsea leikur til úrslita gegn FC Bayern á heimavelli þýska liðsins í München þann 19. maí. Terry verður í leikbanni en í gær gaf UEFA það út að Terry geti tekið þátt í verðlaunaafhendingunni eftir leik fari svo að Chelsea verði Evrópumeistari.

Ef Chelsea vinnur úrslitaleikinn í Meistaradeildinni, þá má John Terry lyfta bikarnum og taka á móti verðlaunum í leikslok," segir m.a. í yfirlýsingu frá knattspyrnusambandi Evrópu.

Chelsea lagði Barcelona 3-2 samanlagt eftir 2-2 jafntefli í síðari leiknum sem fram fór á Nou Camp í Barcelona. Þar lék Chelsea liðið einum færri í rúmlega 55 mínútur. Terry fékk rautt spald í fyrri hálfleik fyrir afar klaufalegt brot og baðst hann afsökunar á hegðun sinni eftir leik.