Stjörnukonur byrja sumarið vel - myndir

Stjörnukonur eru meistarar meistaranna í fyrsta sinn eftir 3-1 sigur á Val á Stjörnuvellinum í kvöld. Stjarnan varð Íslandsmeistari síðasta sumar en Valur vann bikarinn. Stjörnukonur halda áfram að enda sigurgöngur Vals því Valskonur voru búnar að vinna Meistarakeppnina fimm ár í röð.

Ashley Bares, markadrottning síðasta sumars, var í miklu stuði en hún skoraði eitt mark og lagði upp tvö fyrir þær Ingu Birnu Friðjónsdóttur og Ásgerði Stefaníu Baldursdóttur (víti). Leikurinn í kvöld var fyrsti leikurinn sem fer fram á Stjörnuvellinum síðan að lagt var nýtt gervigras á völlinn.

Stefán Karlsson, ljósmyndari Fréttablaðsins og Vísis, var á leik Stjörnunnar og Vals í Garðabænum í kvöld og náði þessum skemmtilegu myndum. Myndirnar má sjá í albúminu hér að neðan. Hægt er að sjá myndirnar stærri með því að smella á þær.