Cech: Ég mæti undirbúinn ef að það verður vítakeppni

Petr Cech, tékkneski markvörðurinn hjá Chelsea, segist hafa unnið heimavinnu sína fyrir leikinn á móti Bayern München fari svo að úrslitaleikur Meistaradeildarinnar endi í vítakeppni. Cech er viss um að Chelsea geti klárað leikinn í venjulegum leiktíma en hefur samt sem áður skoðað vel upptökur af vítum leikmanna Bayern.

„Ég hef allar þær upplýsingar sem ég þarf fyrir vítakeppnina en ég tel samt að úrslitin muni ráðast eftir 90 mínútur," sagði Petr Cech.

„Ég hef horft á upptökur af leikjum Bayern og hef séð það sem ég þarf. Á endanum er þetta spurning um stað og stund og hvort að vítaskyttan er nógu andlega sterk til að halda ró og einbeitingu," sagði Cech.

„Ef vítaskyttan heldur haus þá á markvörðurinn lítinn möguleika. Í vítakeppni verða markmenn að plata vítaskytturnar í að gera mistök," sagði Cech.

„Ég var með nóg af upplýsingum um vítaskyttur Manchester United árið 2006 en við fengum þá 120 mínútur og vítakeppni til þess að vinna Meistaradeildarbikarinn. Við getum ekki breytt þeim úrslitum núna og það er ekki minn stíll að gráta eftir tapleiki. Við getum hinsvegar breytt nútíðinni og framtíðinni og nú fáum við annað tækifæri," sagði Cech.

Cech fagnar þrítugsafmælinu sínu á sunnudaginn og það væri því alvöru afmælisgjöf fyrir hann að vinna Meistaradeildina í fyrsta sinn á ferlinum. „Ef ég fæ bikarinn þá þarf ég ekki köku," sagði Cech í léttum tón.