Ronaldo um sig og Messi: Ekki hægt að bera saman Ferrari og Porsche

Cristiano Ronaldo segir að það sé erfitt að bera tvo ólíka leikmenn saman eins og sig sjálfan og Lionel Messi hjá Barcelona. Þeir skoruðu saman 96 mörk í spænsku úrvalsdeildinni á leiktíðinni og eru í flestra huga tveir bestu knattspyrnumenn heims.

„Það verður stundum þreytandi að menn séu alltaf að bera okkur saman og það er örugglega sömu sögu að segja af honum. Það er alltaf verið að bera okkur saman en það er ekki hægt að bera saman Ferrari og Porsche því þetta eru bílar með ólíkar vélar," sagði Cristiano Ronaldo við CNN en ekki er vitað hvor er Ferrari-bíllinn í hans huga.

„Hann gerir sitt besta fyrir Barcelona og ég geri mitt besta fyrir Real Madrid. Það var ótrúlegt að við skyldum hafa náð að bæta markametin okkar. Við rekum hvorn annan áfram og þess vegna er keppnin svona hörð. Real Madrid og Barcelona eru bestu liðin í heimi af því að þau setja alltaf pressuna á hvort annað," sagði Ronaldo.

„Ég vil alls ekki vera borinn saman við einhvern annan leikmann en svona er þetta bara. Sumir segja að ég sé betri en Messi en aðrir segja að hann sé betri. Ég held samt að ég sá besti á þessari stundu," sagði Cristiano Ronaldo af sinni heimsþekktu hógværð.

Cristiano Ronaldo skoraði 46 mörk og gaf 13 stoðsendingar í 38 leikjum í spænsku deildinni í vetur en Lionel Messi var með 50 mörk og 20 stoðsendingar í 37 leikjum. Ronaldo vann hinsvegar titilinn með Real Madrid sem fékk níu stigum meira en Barcelona.