Federer og Djokovic mætast í undanúrslitum

Tveir af bestu tennisleikurum heims, Roger Federer og Novak Djokovic, munu eigast við í undanúrslitum Wimbledon-mótsins þetta árið.

Þeir fóru báðir létt með andstæðinga sína í fjórðungsúrslitum mótsins fyrr í dag. Federer vann Mikhail Youzhny frá Rússlandi, 6-1, 6-2 og 6-2. Djokovic vann á sama tíma nokkuð öruggan sigur á Þjóðverjanum Floran Meyer, 6-4, 6-1 og 6-4.

Síðari tvær viðureignirnar í fjórðungsúrslitum karla hófust nú fyrir stundu en þar eru miklar vonir bundnar við heimamanninn Andy Murray.

Djokovic er í efsta sæti heimslistans en Federer því þriðja. Rafael Nadal er í öðru sæti en hann datt óvænt út í annarri umferð mótsins. Þeir Djokovic og Federer eru nú að mætast í undanúrslitum í sjötta sinn á síðustu átta stórmótum í tennis.

Djokovic hefur unnið fjórar af þessum sex viðureignum en þeir eru þó í fyrsta sinn að mætast á grasvellinum í Wimbledon.