Þjófar komust fyrstir í iPhone 5 í Japan

Margir virðast hafa áhuga á nýjustu græju Apple, iPhone 5, þeirra á meðal japanskir bófar, því nú lítur út fyrir að verslanir í Japan hafi verið rændar stuttu áður en síminn átti að koma í almenna sölu. Ránsfengurinn er talin um 100 þúsund dollara virði, eða rúmlega 12 milljóna króna.

iPhone 5 er um þessar mundir að komast í sölu víðsvegar í heiminum og verslanir búa sig undir mikla ásókn. Það voru þrjár verslanir í borginni Osaka í Japan sem voru rændar og tæplega 200 símum stolið.

Ránin hafa ekki verið upplýst og ekki er vitað hvort ránin tengdust. Eins og stendur lítur því út fyrir að japanskir neytendur geti komist yfir græjuna eftirsóttu á svörtum markaði á næstu dögum.

Frá þessu er greint hér.