Lampard: Við þurftum að vera þolinmóðir í kvöld

Frank Lampard var fyrirliði Chelsea í kvöld þegar liðið vann 4-0 sigur á FC Nordsjaelland í annarri umferð riðlakeppni Meistaradeildarinnar. Lampard lagði upp fyrsta markið en þrjú síðustu mörkin komu ekki fyrr en í lok leiksins.

„Þetta voru frábær úrslit fyrir okkur því þetta var erfiður leikur. Við vissum ekki alveg út í hvað við vorum að fara en þeir spiluðu góðan fótbolta. Við þurftum að vera þolinmóðir í kvöld en lögðum mikið á okkur og uppskárum mörkin í lokin," sagði Frank Lampard við Sky Sports.

„Ég hafði vissulega smá áhyggjur af því að þetta er Meistaradeildin og þar eru engir leikir auðveldir. Í stöðunni 1-0 þá sköpuðu þeir sér nokkur hálffæri og skutu síðan í stöngina í seinni hálfleiknum. Þetta var hinsvegar komið hjá okkur um leið og við skoruðum annað markið," sagði Lampard.