Khedira: Manchester City eitt af bestu liðum heims

Sami Khedira, miðjumaður Real Madrid, talaði vel um Manchester City þrátt fyrir að lítið hafi gengið hjá ensku meisturunum í Meistaradeildinni. City tekur á móti Real Madrid í Meistaradeildinni á morgun og þarf nauðsynlega á sigri að halda.

„City-liðið er með frábæra leikmenn og þeir geta allir gert útslagið í svona leik. Það skiptir ekki máli hver spilar hjá þeim. Við verðum bara að mæta einbeittir til leiks og loka á þá," sagði Sami Khedira og bætti við: „Manchester City er eitt af bestu liðum heims," sagði Khedira.

Real Madrid er í 2. sæti riðilsins en Manchester City situr á botninum með aðeins tvö stig eða fimm stigum minna en spænska liðið.

„Dortmund sýndi það að það er möguleiki að ógna City í Manchester-borg með því að þétta liðið og berjast fyrir öllum boltum. Við verðum samt að spila okkar leik og láta mótherjana ekki stjórna því hvernig við spilum," sagði Khedira.

Real Madrid vann 3-2 sigur á Manchester City í fyrri leiknum á Santiago Bernabeu í frábærum fótboltaleik.