Syngja lag Jackson og Mercury

Friðrik Ómar og Matthías Matthíasson bregða sér í hlutverk söngvaranna sálugu Michaels Jackson og Freddies Mercury í nýútgefnu lagi.

„Matti er með það rosalega háa rödd og hann tók Freddie án mottunnar," segir Friðrik Ómar um samstarf þeirra en lagið heitir There Must Be More to Life Than This.

Mercury söng lagið einsamall á sínum tíma en eftirlifandi meðlimir Queen ætla síðar á árinu að senda frá sér áður óútgefna hljóðritun af laginu sem hann söng með Michael Jackson. Friðriki Ómari og Matthíasi tókst að vera á undan þeim því þeirra útgáfa er þegar komin í útvarpsspilun.

„Þessu var stungið að mér fyrir Freddie Mercury-tónleikana í fyrra af Rúnari Róberts á Bylgjunni sem er mikill Queen-aðdáandi. Við ákváðum að taka þetta saman við Matti og þetta var skemmtilegt augnablik á tónleikunum," segir Friðrik Ómar. Þeir sungu á fimm tónleikum til heiðurs Mercury í fyrra og ætla að endurtaka leikinn í Eldborg í Hörpu 18. apríl ásamt Eiríki Haukssyni, Eyþóri Inga, Magna og Huldu Björk Garðarsdóttur. Miðasala hefst kl. 12 í dag.

„Það verða þessir einu tónleikar og svo erum við búin að fá fyrirspurnir frá Færeyjum. Svo langar okkur líka að fara með þetta aftur norður á Akureyri." - fb