Heimir Guðjóns: Chelsea verður að vinna í kvöld

Chelsea tekur á móti Barcelona á Stamford Bridge í dag í fyrri leik liðanna í undanúrslitum Meistaradeildar Evrópu og Fréttablaðið fékk Heimi Guðjónsson, þjálfara FH og sérfræðing Stöðvar 2 Sport, til að spá í leikinn.

„Bæði lið hafa verið að spila vel upp á síðkastið. Chelsea hefur bætt sig mikið undir stjórn Roberto Di Matteo og vann Tottenham 5-1 um helgina. Það var góður sigur á góðu liði Tottenham. Þó að eitt markið hafi ekki verið löglegt þá skoruðu þeir fjögur lögleg mörk og unnu leikinn sanngjarnt," segir Heimir.

„Lykillinn að sigri Chelsea er að þeir verða að vinna heimaleikinn. Taktíkin hjá Di Matteo er þannig að þeir hafa legið til baka og beitt skyndisóknum. Leikurinn hefur verið einfaldaður mikið eftir að hann tók við liðinu. Að mínu mati verða þeir að vera aggressívari en þeir hafa verið til þessa," segir Heimir sem býst við að Barcelona-liðið fari varlega inn í leikinn.

„Í ljósi þess að það er El Clasico á laugardaginn þá mun Barcelona sætta sig við jafntefli og að klára þetta síðan á Nou Camp. Það hefur verið þvílíkur stígandi í liði Barcelona og þeir hafa verið að spila frábærlega. Eins og Barcelona er að spila þá búast allir við að þeir klári þetta en Chelsea-liðið er með sterkt lið og með gríðarlega reynslumikla leikmenn. Chelsea verður að vinna þennan leik á Stamford Bridge ef þeir ætla að eiga einhverja möguleika á því að komast áfram. Jafntefli eða tap þýðir bara að þetta er búið og þá verður seinni leikurinn bara reitabolti hjá Barcelona," sagði Heimir að lokum.