Fyrirlestur og bók um mannsheilann

„Við viljum sanna að leiðinlegt fólk geti haldið skemmtilega fyrirlestra," segir myndlistarneminn Sigrún Hlín Sigurðardóttir um verkefni sitt og nýútskrifuðu leikkonunnar Sögu Garðarsdóttur en þær vinna í sumar við að kanna fyrirlestraformið og mannsheilann. Verkefnið hlaut styrk frá Nýsköpunarsjóð námsmanna hjá Rannís og lýkur með fræðilegum fyrirlestri sem verður hálfgerð sýning.

„Við sáum strax að heilinn er engin smá smíði. Við erum núna að skoða hvað við erum órökrétt og hegðum okkur að mestu í samræmi við geðshræringar," segir Saga en umfang heilans er hluti af áskorun verkefnisins. „Listamenn, fávitar og annað venjulegt fólk er svo smeykt við að tækla eitthvað svona flókið og óáþreyfanlegt eins og heilann. Því langaði okkur að gera heiðarlega tilraun til þess að rannsaka hann og koma með okkar eigin tilgátur."

Með verkefninu ætla þær að búa til nýja sýn á það hvernig þekkingu er miðlað. „Það er mikið af fólki að gera spennandi rannsóknir en eiga bágt með að tala fyrir framan aðra. Við viljum sanna að það þarf ekki að segja brandara eða brjóta upp fyrirlestur með laufléttum atriðum til að hann verði skemmtilegur," segir Sigrún og bætir við að þær stöllur séu með bók í bígerð. „Hún verður hugvekja um heilann fyrir venjulegt fólk til að skilja betur sjálft sig."-hþt