Sjálfshjálparbók Sigrúnar selst vel

„Það var reglulega ánægjulegt að sjá hversu vel bókin fór af stað," segir Sigrún Lilja Guðjónsdóttir, eigandi Gyðja Collection og einn af meðhöfundum bókarinnar The Success Secret sem kom út í Bandaríkjunum fyrir viku.

Bókinni var tekið vel vestanhafs og fór strax í annað sæti á metsölulista Amazon.com yfir bækur af þessu tagi. Þetta er ekki í fyrsta sinn sem Sigrún Lilja tekur þátt í slíku verkefni, en hún var einn af meðhöfundum bókarinnar The Next Big Thing sem einnig fékk góðar undirtektir þegar hún kom út í fyrra. „Það að The Success Secret hafi farið beint á metsölulistann hjá Amazon þegar hún kom út var framar mínum björtustu vonum. Þar með toppaði hún hina bókina sem kom út í fyrra og það hafði ég varla þorað að láta mig dreyma um."

Aðalhöfundur The Success Secret er Jack Canfield, sem er þekktur fyrir aðkomu sína að bókunum The Secret og Chicken Soup for the Soul. Sigrún Lilja og fleiri frumkvöðlar í atvinnulífinu eru meðhöfundar, en umfjöllunarefnið er árangurssögur og hagnýt ráð frá sérfræðingum sem hafa náð langt á sínu sviði.

Vegna velgengni bókarinnar hefur Sigrún Lilja fengið boð á verðlaunahátíð metsöluhöfunda í Los Angeles þar sem hún hyggst taka á móti verðlaunum fyrir framlag sitt. Þetta er í annað sinn sem Sigrún fær boð á hátíðina.

„Hátíðin fer fram í september í Roosevelt-hótelinu í Hollywood. Það er að mörgu að huga fyrir svona hátíð svo ég er á fullu að undirbúa mig með mínu teymi hér," segir Sigrún en næst á dagskrá hjá henni er að þróa glænýtt ilmvatn fyrir jólin ásamt öðrum verkefnum sem hún vill ekki fara nánar út í þessa stundina. - áp