Svartir dagar í Bíói Paradís

Svartir sunnudagar nefnist dagskrárliður í Bíói Paradís sem fram fer öll sunnudagskvöld. Aðstandendur Svartra sunnudaga eru Hugleikur Dagsson, Sjón og Sigurjón Kjartansson og hafa þeir staðið fyrir sýningum á myndum sem falla undir költ-flokkinn.

Tónlistarmaðurinn Páll Óskar Hjálmtýsson hefur verið fenginn til liðs við þá félaga og mun hann standa fyrir sérstöku Todd Browning kvöldi næstkomandi sunnudag. Þá verða sýndar tvær myndir í leikstjórn Browning; Dracula frá 1931 og Freaks frá 1932. Páll Óskar mun einnig halda stuttan fyrirlestur um Browning sem var gerður útlægur úr Hollywood eftir gerð hinnar umdeildu kvikmyndar Freaks.

Freaks var byggð á smásögu eftir Tod Robbins sem bar titilinn Spurs og kom út árið 1923. Browning, sem hafði starfað í nokkur ár hjá farandsirkus, fékk fólk með raunverulega fötlun til að leika í myndinni í stað leikara.

Þetta vakti hörð viðbrögð meðal almennings og var myndin meðal annars bönnuð á Englandi í þrjátíu ár. Eftir að Freaks kom út átti Browning í erfiðleikum með að finna vinnu og leið ferill hans undir lok skömmu síðar.

Sýningar hefjast klukkan 20 í Bíói Paradís.