Lögfræðingur kærir San Antonio fyrir að hvíla leikmenn

Lögfræðingur í Flórída er búinn að kæra NBA-liðið San Antonio Spurs í kjölfar þess að þjálfarinn, Gregg Popovich, hvíldi fjóra lykilleikmenn í leiknum gegn Miami Heat.

Lögfræðingurinn vill meina að Popovich hafi brotið lög með því að senda þá Tim Duncan, Manu Ginobili, Danny Green og Tony Parker heim í stað þess að spila þeim í leiknum sem var sýndur út um allt land.

Lögfræðingurinn segist hafa orðið fyrir fjárhagslegu tjóni og talar um vörusvik. Þetta hafi verið eins og að fara á steikhús en fá bara samloku.

Yfirmenn NBA-deildarinnar voru ekki heldur hrifnir af þessu uppátæki og sektuðu Popovich um 250 þúsund dollara fyrir þessar þjálfunaraðferðir.