Duncan valinn í Stjörnuleikinn í fjórtánda sinn

NBA-deildin í körfubolta tilkynnti í gær hvaða sjö leikmenn bættust í hvort Stjörnulið fyrir Stjörnuleik deildarinnar sem fram fer í Houston í næsta mánuði. Fimm leikmenn Austurstrandarinnar voru valdir í Stjörnuleik í fyrsta sinn en James Harden er eini nýliðinn í liði Vesturstrandarinnar.

Tim Duncan hjá San Antonio Spurs var valinn í sinn fjórtánda Stjörnuleik en liðsfélagi hans Tony Parker er einnig meðal varamanna Vesturdeildarinnar. San Antonio er eitt af fjórum liðum sem á tvo leikmenn í liði Vestursins en hin eru Los Angeles Clippers, Los Angeles Lakers og Oklahoma City Thunder.

Duncan var ekki valinn í fyrra en hefur átt magnað tímabil 36 ára gamall þar sem hann er með 17,5 stig, 9,8 fráköst og 2,7 varin skot að meðaltali í leik.

Heimamaðurinn James Harden var valinn í fyrsta sinn í Stjörnuleik og mun þar spila á ný með Kevin Durant og Russell Westbrook, fyrrum félögum sínum hjá Oklahoma City Thunder.

Nýliðar í liði Austurstrandarinnar eru Joakim Noah, Tyson Chandler, Paul George, Kyrie Irving og Jrue Holiday. Chris Bosh var valinn í sinn áttunda Stjörnuleik og sér til þess að Miami Heat á þrjá fulltrúa í leiknum því Dwyane Wade og LeBron James eru báðir í byrjunarliðinu.

Stephen Curry hefur verið frábær hjá Golden State Warroirs og er með 20,9 stig og 6,6 stoðsendingar að meðaltali í leik en það dugaði honum ekki til þess að vera valinn. Hann er stigahæsti leikmaður deildarinnar sem ekki kemst í Stjörnuleikinn í ár.

Hér fyrir neðan má sjá lista yfir þá leikmenn sem taka þátt í Stjörnuleiknum 2013 sem fer fram í Toyota Center í Houston 17. febrúar næstkomandi.

Lið Austurstrandarinnar:

Byrjunarlið:

Bakvörður - Rajon Rondo, Boston Celtics (4. sinn)

Bakvörður - Dwyane Wade, Miami Heat (9.)

Framherji - LeBron James, Miami Heat (9.)

Framherji - Carmelo Anthony, New York Knicks (6.)

Framherji - Kevin Garnett, Boston Celtics (15.)

Varamenn:

Framherji - Chris Bosh, Miami Heat (8.)

Miðherji - Tyson Chandler, New York Knicks (Nýliði)

Framherji - Luol Deng, Chicago Bulls (2.)

Framherji - Paul George, Indiana Pacers (Nýliði)

Bakvörður - Jrue Holiday, Philadelphia 76ers (Nýliði)

Bakvörður - Kyrie Irving, Cleveland Cavaliers (Nýliði)

Miðherji - Joakim Noah, Chicago Bulls (Nýliði)



Lið Vesturstrandarinnar:

Byrjunarlið:

Bakvörður - Chris Paul, Los Angeles Clippers (6. sinn)

Bakvörður - Kobe Bryant, Los Angeles Lakers (15.)

Framherji - Kevin Durant, Oklahoma City Thunder (4.)

Framherji - Blake Griffin, Los Angeles Clippers (3.)

Miðherji - Dwight Howard, Los Angeles Lakers (7.)

Varamenn:

Framherji - LaMarcus Aldridge, Portland Trail Blazers (2.)

Framherji - Tim Duncan, San Antonio Spurs (14.)

Bakvörður - James Harden, Houston Rockets (Nýliði)

Framherji - David Lee, Golden State Warriors (2.)

Bakvörður - Tony Parker, San Antonio Spurs (5.)

Framherji - Zach Randolph, Memphis Grizzlies (2.)

Bakvörður - Russell Westbrook, Oklahoma City Thunder (3.)