Turkoglu í 20 leikja bann fyrir steranotkun

Tyrkneski NBA-leikmaðurinn Hedo Turkoglu hjá Orlando Magic hefur verið dæmdur í 20 leikja bann fyrir ólöglega steranotkun en tók út fyrsta leikinn í banninu á móti Atlanta Hawks í nótt.

Metenolone sem er anabólískur steri fannst í sýni Hedo Turkoglu. Leikmaðurinn segist hafa fengið lyfið frá tyrkneskum þjálfara síðasta sumar þegar hann var að ná sér góðum af axlarmeiðslum og að hann hafi ekki passað upp á það að athuga hvort innihaldið væri á bannlista NBA-deildarinnar.

„Þetta eru verstu kringumstæðurnar fyrir leikmann að vera í. Ég er mjög leiður yfir því að hafa sett mitt félag í þessar aðstæður og bið alla innilega afsökunar. Ég hefði átt að skoðað þetta lyf betur," sagði Hedo Turkoglu.

Hedo Turkoglu hefur verið mikið meiddur á þessu tímabili og missti meðal annars af 28 leikjum í byrjun tímabils eftir að hann braut bein í hendinni. Hann hefur aðeins náð að spilað ellefu leiki og er með 2,9 stig, 2,1 stoðsendingu og 2,4 fráköst að meðaltali í þeim.

„Þetta er búin að vera ein samfelld martröð og þetta er alls ekki búið að vera gott ár fyrir mig," sagði Turkoglu.

Orlando Magic borgar Hedo Turkoglu 11,8 milljónir dollara í árslaun sem eru um einn og hálfur milljarður í íslenskum krónum.