Ronaldo: Áttum skilið að skora fleiri mörk

Portúgalinn Cristiano Ronaldo, leikmaður Real Madrid, spilaði í fyrsta skipti gegn sínu gamla félagi í kvöld og náði að skora glæsilegt skallamark.

Ronaldo átti fleiri færi í leiknum en tókst ekki að bæta við og leikur Real og Man. Utd endaði 1-1.

"Þetta var erfiður leikur. United er gríðarlega öflugt varnarlið. Við spiluðum betur og áttum skilið að skora meira," sagði Ronaldo eftir leikinn en hans menn þurfa nú að skora í Manchester.

"Ég spilaði í Manchester í sex ár. Félagið tók vel á móti mér er ég var krakki og það er mjög sérstakt að spila gegn þessu félagi. Ég ber mikla virðingu fyrir félaginu.

"Við eigum enn möguleika í seinni leiknum og við munum reyna að nýta þann möguleika til fullnustu."