Welbeck og Van Persie sáttir

Hollendingurinn Robin Van Persie og markaskorarinn Danny Welbeck voru ánægðir með jafnteflið á Santiago Bernabeu í kvöld.

"Við fengum færi til þess að klára leikinn en ef okkur hefði verið boðið 1-1 fyrir leik þá hefðum við tekið því boði. Þetta hlýtur að hafa verið frábær leikur fyrir áhorfendur," sagði Van Persie og bætti við:

"Við stöndum aðeins betur að vígi eftir þennan leik en þegar komið er á þetta stig keppninnar skiptir heima- og útivöllur ekki máli. Það er hálfleikur núna og við verðum klárir í seinni hálfleikinn."

Welbeck átti einn sinn besta leik í búningi Man. Utd og skoraði frábært mark.

"Ég vissi hvar Wayne myndi setja þessa hornspyrnu og sem betur fer náði ég að skora," sagði Welbeck hógvær eftir leik en hann var að skora sitt fyrsta Meistaradeildarmark á útivelli í kvöld.

"Það er frábært að spila á þessum velli. Við komum samt til þess að spila leikinn en ekki til þess að horfa á."