Mourinho: Getum skorað meira en eitt á Old Trafford

Jose Mourinho segir að leikur Real Madrid og Manchester United í kvöld hafi ekki komið sér á óvart en liðin skildu jöfn í Meistaradeildinni í kvöld, 1-1.

„Ég átti von á þessu. Þetta var mjög opinn leikur og mun ekki ráðast fyrr en á lokamínútunum í seinni leiknum," sagði Mourinho en hann er stjóri Real Madrid.

„Þeir breyttu sínum leikstíl fyrir þennan leik - Rio og Evans stigu ekki fæti á okkar vallarhelming allan leikinn. Þeir treystu þess í stað á föst leikatriði eða skyndisóknir. Við vorum liðið sem vorum að elta leikinn."

Síðari viðureign liðanna í 16-liða úrslitunum fer fram í Manchester þann 5. mars næstkomandi.

„Það er allt enn galopið og ég segi enn að bæði lið eigi helmingslíkur á að komast áfram. En við getum skorað meira en eitt mark á Old Trafford."