Drogba var löglegur

Knattspyrnusamband Evrópu, UEFA, hefur staðfest að Didier Drogba hafi verið löglegur í leiknum gegn Schalke í sextán liða úrslitum Meistaradeildarinnar.

Forráðamenn Schalke voru á því að Drogba væri ólöglegur og sendu inn kvörtun til UEFA sem hefur nú tekið málið fyrir og úrskurðað.

Schalke vildi meina að Drogba hefði ekki verið skráður til keppni í tíma. UEFA segir aftur á móti að hann hafi verið skráður fyrir 1. febrúar sem var tíminn sem Galatasaray hafði til þess að skrá hann.

Úrslit leiksins standa því og Drogba má spila síðari leikinn.