Ancelotti: Ekki markmiðið að vinna Meistaradeildina

Carlo Ancelotti, stjóri PSG, var ánægður með að vera kominn áfram í 8-liða úrslit Meistaradeildar Evrópu.

PSG gerði í kvöld 1-1 jafntefli við Valencia á heimavelli en liðið komst áfram með 3-2 samanlögðum sigri.

„Við þurftum að hafa fyrir þessu enda mjög erfiður leikur. En við vissum að Valencia myndi reyna að spila sinn leik hér í kvöld og liðið gerði það vel," sagði Ancelotti eftir leikinn.

„Fyrri hálfleikur var ekki það besta sem við höfum sýnt en þetta skánaði hjá okkur eftir að við fengum á okkur markið. Við vöknuðum til lífsins þegar þeir skoruðu og höfðum ágæta stjórn á leiknum eftir það."

„Þetta eru mjög mikilvæg úrslit fyrir alla hjá félaginu. Við höfum beðið í átján ár eftir að hafa komast aftur í 8-liða úrslit Meistaradeildarinnar."

Ancelotti segir það þó ekki markmið félagsins að vinna Meistaradeildina þetta árið. „Við ætlum að gera okkar besta, eins og við höfum gert hingað til. Við unnum riðilinn okkar og komumst áfram úr 16-liða úrslitunum og við höldum vonandi áfram á þeirri braut."