Barcelona bíður eftir Vilanova og breytir engu

Barcelona-menn lifa enn í voninni um að þjálfarinn Tito Vilanova snúi aftur fyrir lok tímabilsins en Tito Vilanova er í krabbameinsmeðferð í New York í Bandaríkjum á meðan allt er í tómu tjóni hjá Barcelona-liðinu inn á vellinum.

Tito Vilanova fór í aðgerð í desember og hefur síðan gengist undir lyfja- og geisla-meðferð á virtum krabbameinsspítala í New York. Hann snéri aftur í stuttan tíma en hefur ekki verið með liðinu undanfarnar vikur.

Barcelona hefur tapað tvisvar fyrir Real Madrid á innan við viku og tapaði 2-0 fyrir AC Milan í fyrri leik liðanna í sextán liða úrslitum Meistaradeildarinnar.

„Hann er að vonast til að meðferðin taki enda eins áætlunin gerði ráð fyrir sem var í endaðan mars," sagði Sandro Rosell, forseti Barcelona, en aðstoðarmaður Vilanova, Jordi Roura, stýrir liðinu á meðan.

„Hann sagðist vera ánægður þegar ég talaði við hann á dögunum því hann var þá meira en hálfnaður með meðferðina og gat farið að telja niður. Það er mjög gott fyrir hugann. Hann vill koma aftur og við viljum fá hann aftur," sagði Rosell.

„Það er algjört forgangsatriði að Tito nái heilsu á nýjan leik og allt annað verður þangað til í öðru sæti. Það breytist ekkert þangað til að Tito kemur aftur þó að það kosti okkur alla titlana. Ég myndi kalla þetta árangursríkt tímabil ef Tito nær fullri heilsu," sagði Rosell.