Jones ekki með United á morgun

Phil Jones mun ekki spila með Manchester United gegn Real Madrid í Meistaradeild Evrópu á morgun.

Þetta staðfesti knattspyrnustjóri United, Alex Ferguson, í dag en Jones meiddist í 2-1 sigri liðsins á Reading í ensku bikarkeppninni í síðasta mánuði.

Jones stóð sig vel í fyrri leiknum gegn Real í 16-liða úrslitum Meistaradeildarinnar. „Hann var frábær á Spáni og þó svo að það séu vonbrigði að missa hann þá komumst við af án hans. Við erum með aðra leikmenn sem geta leyst hann af hólmi," sagði Ferguson.

Rio Ferdinand missti af leik United gegn Norwich um helgina vegna veikinda en kemur til greina gegn Real á morgun, rétt eins og Jonny Evans og Nemanja Vidic.

„Þetta er jákvætt vandamál því allir þrír hafa verið að spila mjög vel. Við munum taka ákvörðun og vonandi verður hún sú rétta."