Messi nær mögulega seinni leiknum

Meiðsli Lionel Messi eru ekki jafn alvarleg og í fyrstu var óttast en hann var tekinn af velli í leik Barcelona og PSG í Meistaradeild Evrópu í gær.

Þetta var fyrri leikur liðanna í fjórðungsúrslitum en honum lauk með 2-2 jafntefli. Síðari leikurinn fer fram í næstu viku og er ekki útilokað að Messi nái honum.

Messi mun þó missa af leik Börsunga gegn Real Mallorca um helgina en það var staðfest af félaginu í dag. Það mun svo koma í ljós þegar nær dregur hvort hann nái síðari leiknum gegn PSG.

Messi fann fyrir óþægindum aftan í hægra læri í leiknum í gær og var því tekinn af velli.

Það er því ljóst að Messi mun ekki skora í 20. deildarleik Barcelona í röð en hann hefur skorað í síðustu nítján deildarleikjum liðsins. Það er vitanlega met.