PSG vill halda Beckham

Forráðamenn franska liðsins PSG eru ánægðir með David Beckham og hafa áhuga á því að halda honum á næsta tímabili.

Beckham kom til PSG í janúar og gerði þá fimm mánaða samning við félagið. Forseti félagsins, Nasser Al-Khelaifi, sér ekki eftir því.

„Það reyndist ein af mínum betri ákvörðunum að fá Beckham. Hann er ótrúlegur sem einstaklingur, leikmaður og fulltrúi okkar. Koma hans hefur skapað eitthvað sérstakt í hópnum. Við munum ræða við hann um framhaldið."

„Við munum virða ákvörðun David en hann er ánægður í París og við viljum halda honum áfram."

PSG mætir Barcelona í fyrri leik liðanna í fjórðungsúrslitum Meistaradeildar Evrópu klukkan 18.45 í kvöld.