Rómarslagur í úrslitum bikarkeppninnar

Roma sló út stórlið Inter í undanúrslitum ítölsku bikarkeppninnar og munu nú mæta grönnunum og erkifjendunum í Lazio í úrslitaleik keppninnar.

Úrslitaleikurinn fer fram á Ólympíuleikvanginum í Róm þann 26. maí næstkomandi.

Jonathan kom Inter yfir í kvöld en Mattia Destro kom Roma yfir með tveimur mörkum um miðbik síðari hálfleiks.

Vasilis Torosidis jók muninn í 3-1 á 74. mínútu áður en Ricardo Alvarez klóraði í bakkann fyrir Inter tíu mínútum fyrir leikslok.

Lazio sló út Juventus í hinum undanúrslitaleiknum en hann fór reyndar fram í lok janúarmánaðar.