Juventus hefur áhuga á Robben og Sanchez

Juventus er svo gott sem búið að tryggja sér meistaratitilinn á Ítalíu annað árið í röð og forráðamenn félagsins eru þegar farnir að horfa til næsta tímabils.

Framkvæmdastjóri félagsins, Giuseppe Marotta, hefur viðurkennt að hann sé mjög spenntur fyrir Arjen Robben, leikmanni Bayern, og Alexis Sanchez hjá Barcelona.

"Þetta eru tveir frábærir leikmenn sem ég hef mikið álit á. Ég get samt ekki sagt mikið meira um málið á þessu stigi," sagði Marotta.

Sanchez gæti verið seldur frá Barcelona og það á líka eftir að koma í ljós hvort Pep Guardiola hefur áhuga á því að nýta krafta Robben sem þykir ansi oft vera frekar eigingjarn.