Carmelo Anthony frábær í sigri Knicks

Carmelo Anthony fór á kostum þegar New York Knicks tók forystu gegn Boston Celtics með 85-78 sigri í Maddison Square Garden í New York í kvöld.

Anthony var ekki mikið fyrir að gefa boltann frekar en venjulega enda var kappinn sjóðandi heitur. Stigin urðu 36 áður en yfir lauk en Anthony var að hitta sérstaklega vel fyrir utan þriggja stiga línuna.

Leikurinn var jafn langt fram í fjórða leikhluta. Þá sigu heimamenn, sem hafa verið á mikilli siglingu undanfarið, fram úr gestunum og unnu sjö stiga sigur.

„Þetta var mikilvægur leikur. Við verðum að halda heimaleikjaréttinum. Við eigum leik númer tvö hérna líka og ætlum að vinna aftur,“ sagði Carmelo Anthony í leikslok.

Jeff Green skoraði mest fyrir Boston eða 26 stig en Paul Pierce skoraði 21 stig.