Grunaðir smyglarar svara til saka

Ákæra var þingfest í morgun á hendur sjömenningum sem grunaðir eru um að hafa flutt inn 20 kíló af amfetamíni og 1,7 lítra af amfetamínbasa í byrjun ársins.

Þetta er eitt stærsta fíkniefnamál sem komið hefur upp hér á landi í marga mánuði. Tíu manns voru handteknir á rannsóknarstigi málsins. Sex af þeim sættu gæsluvarðhaldi og voru fimm þeirra, auk tveggja annarra ákærðir. Tollvörður, sem sat um tíma í gæsluvarðhaldi, var ekki ákærður.

Tveir hinna ákærðu, bræðurnir Jónas og Jón Baldur Valdimarssynir, játuðu sök að hluta við þingfestingu. Hið sama á við um Símon Pál Jónsson. Þeir neita hins vegar allir að hafa skipulagt smyglið. Tveir litháískir karlmenn neituðu sök. Tveir ungir Íslendingar sem hlut áttu að máli játuðu sök.