Balotelli labbar útaf næst

Mario Balotelli, framherji AC Milan, hefur ítrekað verið fórnarlamb kynþáttafordóma hjá stuðningsmönnum andstæðinganna síðan að hann snéri aftur til Ítalíu í janúarglugganum. Þetta gerðist síðast á móti Roma á sunnudagskvöldið þar sem þurfti að gera hlé á leiknum til þess að fá stuðningsmenn Roma til að hætta níðsöngvunum um Balotelli og Kevin Prince-Boateng.

Balotelli sagðist í samtali við CNN hafa verið að hugsa alvarlega um að yfirgefa völlinn þegar stuðningsmenn Roma hófu að kalla miður falleg orð til hans í umræddum leik sem endaði með markalausu jafntefli.

„Ef þetta gerist einu sinni enn þá mun ég labba útaf því þetta er svo heimskt," sagði Mario Balotelli við CNN.

„Ég var að pæla í því að fara af velli á sunnudaginn en vildi ekki láta þá halda að ég væri að fara af því að það gengi ekki nógu vel hjá okkur í leiknum," sagði Balotelli.

Söngvarnir fóru að heyrast í upphafi seinni hálfleiks þegar AC Milan var bara með tíu menn eftir að Sulley Muntari var rekinn af velli.

„Ég hugsaði að það væri betra að klára leikinn og ræða þetta síðar," sagði Balotelli. Dómarinn stoppaði leikinn í tvær mínútur á meðan var þaggað niðri í stuðningsmönnum Roma en Roma fékk síðan 50 þúsund evra sekt frá ítalska sambandinu.

„Ég sagði alltaf einu sinni að ég ætlaði ekki að láta þetta hafa áhrif á mig og halda áfram eins og ekkert hafi í skorist en ég er núna búinn að breyta um skoðun," sagði Balotelli.