Kvaddi með heilsíðu auglýsingu

Edison Cavani gekk á dögunum í raðir Paris Saint-Germain í Frakklandi frá Napólí.

Cavani hefur verið í herbúðum Napólí frá því árið 2010 þegar hann gekk í raðir félagsins frá Palermo. Hann fór nokkuð óvenjulega leið þegar kom að því að kveðja stuðningsmenn liðsins.

Cavani fjárfesti nefnilega í heilsíðu í ítalska dagblaðinu Carriere dello Sport þar sem finna má fallega svart-hvíta ljósmynd af framherjanum auk textans:

„Eitt þúsund ógleymanlegir dagar, 104 stórkostleg augnablik með ykkur. Azzurro mun alltaf eiga stað í hjarta mínu. Þakka ykkur fyrir alla ástina. Takk Napólí."

Framherjinn frá Úrúgvæ var seldur til Parísarliðsins á 64,5 milljónir evra fyrr í sumar. Hann skoraði 104 mörk í 138 leikjum með Napólí.