Bale fer í sama launaflokk og Ronaldo

Samkvæmt heimildum spænska blaðsins Marca þá verða peningar ekki mikið vandamál í framtíðinni hjá Walesverjanum Gareth Bale ef hann semur við Real Madrid.

Marca hélt því fram í morgun að búið væri að semja um sölu á Bale frá Tottenham til Real Madrid. Marca segist einnig hafa heimildir um launin sem Bale á að fá.

Bale mun verða með 1,6 milljarð króna í árslaun og það eftir skatt. Það má leyfa sér aðeins fyrir slíkan seðil.

Bale færi þar með í sama launaflokk og Cristiano Ronaldo og Kaká sem gera það einnig ansi gott.

Ef eitthvað er að marka heimildir Marca þá mun Bale skrifa undir sex ára samning við spænska stórliðið.