Abidal: Ég væri enn hjá Barca ef Guardiola hefði ekki farið

Franski varnarmaðurinn Eric Abidal er viss um að væri enn að spila með Barcelona ef að Pep Guardiola hefði ekki hætt þjálfun liðsins sumarið 2012.

Eric Abidal yfirgaf Barcelona í lok síðasta tímabils og ákvað að semja í framhaldinu við franska liðið Mónakó. Eric Abidal kom tvívegis til baka inn i Barcelona eftir baráttu við krabbamein í lifur, fyrst eftir aðgerð og svo eftir lifrarígræðslu.

Það gleyma fáir því þegar Eric Abidal fékk að taka við Meistaradeildarbikarnum eftir að Barcelona vann hann á Wembley vorið 2011.

„Hlutirnir væri öðruvísi ef að Guardiola væri enn hjá Barcelona. Hann er maður sem metur mig mikils og við erum enn í miklu sambandi. Hann er frábær þjálfari og hann gaf mér tækifæri hjá Barcelona. Ef hann hefði haldið áfram með Barcelona-liðið þá væri ég kannski enn að spila með liðinu," sagði Eric Abidal í viðtali við L'Equipe.

„Vandamálið var að samningurinn minn var að renna út og það var ekki annað í stöðunni en að fara. Þetta snérist ekki um peninga og félagið borgaði mér ekki einu sinni í veikindunum. Minn tími hjá Barcelona var á enda en ég er ánægður með að vera kominn til Mónakó," sagði Abidal.