Torres meiddist eftir 36 sekúndur

Fernando Torres fór af velli snemma leiks í 4-0 sigri Chelsea á Steaua Búkarest í Meistaradeild Evrópu í gærkvöldi.

Torres meiddist á hné eftir aðeins 36 sekúndur í Rúmeníu í gær þegar hann gerði atlögu að boltanum. Hann reyndi að halda áfram en þurfti að fara af velli á 11. mínútu.

Spánverjinn mun gangast undir myndatöku til þess að fá úr því skorið hversu alvarleg meiðslin eru. Læknateymi Chelsea er bjartsýnt á að meiðslin séu ekki virkilega alvarleg.

„Það er samt eitthvað að hnénu á honum og nú bíðum við eftir niðurstöðu úr myndatöku,“ sagði Jose Mourinho, stjóri Chelsea, í gær.

Framherjinn 29 ára verður í leikbanni á sunnudaginn þegar Chelsea mætir Norwich. Torres fékk tvö gul spjöld í 1-1 jafnteflinu gegn Tottenham um liðna helgi.