Lásasmiðurinn kominn aftur til starfa

Lásasmiðurinn sem lögreglan fékk til að dýrka upp lásinn á íbúð byssumannsins í Hraunbæ er snúinn aftur til vinnu, að því er heimildir Vísis herma.

Maðurinn var kallaður til þegar sérsveit lögreglunnar reyndi að komast inn í íbúð byssumannsins aðfaranótt mánudags í Hraunbæ.

Lásasmiðurinn mun hafa verið í stórhættu þegar hann var við störf en maðurinn skaut nokkrum skotum í áttina að lögreglumönnunum þegar þeir reyndu að brjótast inn í íbúðina.

Ólafur Már Ólafsson, framkvæmdastjóri Neyðarþjónustunnar, vildi lítið tjá sig um málið í samtal við Vísi í gærkvöldi. Hann sagði að útkallið hafi verið eðlilegt í upphafi. Það hafi í raun allt verið eðlilegt þar til að lásasmiðurinn hafði opnað hurðina og þá hófst skothríð.

Ólafur vildi annars ekki tjá sig meira um málið en fyrirtækið er bundið trúnaði við sína viðskiptavini.